طريقة عمل البلوبيف في المنزل
- المقادير:
- نص كيلو لحمة (كل ما تبقى خشنة تبقى أجمل و أجمل، يعني لو لحم جملي، يا سلام سلم). اللحم لازم يكون "دسم" "فيه دهون يعني"، لو عندك لحم ملبس، يبقى تمام، مفيش يبقى لحم أحمر عادي و ضيفي قطعة دهن بحجم البرتقالة كده ممكن تضيفها على النص كيلو، أو يكون كله على بعضه نص كيلو، براحتك خاااالص
- بصلة كبيرة (مقطعة أربعة و بقشرها) و لو بصلة حمرا يبقى رائع، مفيش أحمر، مالها الأبيض زي الفل، احنا بنوفر على نفسنا و نسهل الامور.
- 5 فصوص توم صحاح
- كام قرن شطة (حسب الرغبة) مفيش قرون ضيفي شطة مطحونة عادي جدا (و متخافيش مش هتبقى سبايسي اوي)
- نصف لتر ماء واحد فقط للسلق (الخطوة دي مهمة جداااا، لأننا مش عايزين شوربة و اللحمة تبقى طعم المسلوقة احنا عايزين صوص جميل و غني)
- ملح (ياريت تزودي شوية لأن البلوبيف بيبقى أطعم و هو ملحه زياده حبة)
- نصف معلقة فلفل اسود مطحون جيدا.
- بالنسبة بقى للون، هتلاقي وصفات تقولك فول صويا و مش عارف ايه، انا كان عندي قطعة بنجر مجمدة سلقتها مع اللحمة، معندكيش، و لا يهمك خالص الطعم و جماله هينسوكي اللون خااالص.
--------------------
و بس خلاص، المقادير كده خلصت؟ آه و الله خلصت مش قولتلكم أوفر و أسهل بلوبيف
الخطوات بقى و لا أسهل:
هنسلق اللحمة (كل المكونات اللي فوق سوا) نص سلقة، و بأكرر تاني نص سلقة فقط عايزين اللحمة تكون لسه شادة حبة مش تتهري، لأنها لو اتهرت هتبقى عاملة زي اللنشون في القوام و ده صنف مختلف.
- هناخد اللحمة و كل البصل و التوم و الشطة نصيفهم من صوص السلق، و هى سخنة جدا، (قشر البصل تشيليه خالص)، هنضيف عليها 3 معالق كبار من الشوربة اللي اتسلقت فيها، و فص توم فريش واحد، و نصف معلقة الفلفل الاسود، و نفرمها في الكبة فرم خفيف، يعني يادوب 4 - 5 نبضات كده بحيث تبقى شبه قوام البلوبيف و باين فيها "نسير اللحمة". عايزة تكتري الكمية ضيفي كام معلقة رز مطحون أو نشا، بس متكتريش عشان الطعم الغني يدوم و يدوم ههههههههه الطعم طلع معايا حاجة كده بين البلوبيف و اللحمة الباردة، يعني اتنين في واحد
- الحفظ بقى زي ما تحبي، عايزاها بشكل قالب البلوبيف ماشي، عايزاها عادية ماشي، انا حفظتها في علبة تلاجة كبستها كويس و غطيتها و سيبتها حوالي خمس ست ساعات و بعدين استعملتها، الكمية مش كبيرة، لكنها غنية جدا في الطعم عشان كده هتلاحظي إن أقل كمية منها هتحسي بجمال طعمها جدا، لما تعملي بيض او بيتزا او ساندوتشات، الكمية دي عملت قالب تقريبا قد حجم علبة الجبنة الفيتا الكيلو، و عملت منها أطعم بيض بالبلوبيف مع ساندوتش
ات بلوبيف بالطحينة و الخس رووووعة. و كمان عملت بيتزا بالبلوبيف طلعت جنااااان، الكمية قضيتنا 3 أيام بفضل الله تعالى، و الصوص اللي اتبقى احتفظت بيه و ضيفته على محشي الخضار النهارده و كان االطعم مميز جدااا، يارب تجربوها و تعجبكم و توفر معاكم و اكون افادتكم بوصفة بيتي موفرة و مضمونة، دمتم في أمان الله و أمنه
كل الشكر للمتابعة
Nour
