طريقة عمل السينابون

السينابون

=-=-=-=-

المقادير/

٥كوب دقيق..تلت كوب سكر..رشه ملح..كوب لبن دافي..١٠٠ جم (نص كوب)زبدة سايله مش سايحه..معلقتين كبار كريم شانتيه باودر..٢ بيضه..فانيلا ..باكو خميرة فوريه..معلقه ك خل

للحشو

زبدة بحرارة الغرفه حوالي ٣ معالق ك..كوب سكر..معلقتين كبار قرفه ..يمكن اضافه معلقه صغيرة كاكاو خام مش اكتر من معلقه ص

الصوص الابيض

حوالي ٢٠٠ جم مثلا از اقل شويه جنيه كريمي اي نوع انا استخدمت كيىري سايب من فتح الله

لبن مكثف محلي انا عاملاه فالبيت 

مقاديره: كوب لبن بودرة كوب سكر بودرة نص كوب ميه مغليه معلقه ك زبده و علي بعض فالكبه او الخلاط لما يندمجوا كويس اوي و فضيه فبرطمان 

طبعا ممكن تعملي نص الكميه

معلقتين بودرة كريم شانتيه

**هاتجيبي حوالي كوب الا ربع لبن مكثف الي عملتيه علي كميه الجبنه و الكريم شانتيه و تخفقي بالخلاط و اتحكمي فالسمك لو تخين اوي زودي ميه او لبن بالمعلقه

**صوص التوفي

خمس معالق سكر عالنار مع معلقتين ميه يتكرملوا ع النار اضيف معلقه زبده كبيرة و انزل عليهم بكوب لبن مدوب فيه معلقه نشا كبيرة مليانه لحد ما يندمجوا والقوام يظبط و لما بتطفي بيتقل خلي بالك

هاتحطي في بوله العجن اللبن الدافي مع الخميرة الجافه مع السكر و الملح و الخل و الزبدة السايله و البيض والفانيلا و تقلبي بمضرب يدوي كويس جدا 

هاتحطي الكريم شانتيه علي الدقيق و تنزلي بالدقيق علي الخليط و سيبي نص كوب او كوب الا ربع هاتضيفيهم حبه حبه بعد ما تلمي العجين

هاتعجني كويس و تلمي العجينه متكونش ملزقه ولا يابسه تكون طريه كده و ملبن

هتغطيها و تكيسيها و تسيبيها تخمر ساعة الا ربع او اكتر في مكان دافي و خلي بالك الجو برد

خمرت و تمام هاتدهني السطح دقيق و تفرديها زي الصور مربع و تدهنيها زبده كلها و تخلطي السكر مع القرفه لوحدهم و الكاكاو لو حابه و تحطي علي الزبدة زي الصور

هاتبداي تلفي رول و علي ضيق عشان الحشو مينزلش و هاتقطعي الحجم الي انتي عايزاه

انا عملته كبير ستاندارد مقاس اصبعين لكن انتي صغري خاصه لو عندك اطفال و بيكبر جدا بعد ما يخمر

هاتجيبي صاج تدهنيه زيت و ترصي وحدات السينابون علي مسافات اوعي تلزقيهم لانهم هايخمروا

هاتسيبيهم يخمروا فالصاج بمكان دافي و تغطيهم حوالي ساعة الا ربع

و هاتخبزي علي ٢٠٠ او ٢٢٠ الرف الوسط من ٢٠:٢٥ دقيقه بتلاقي الوش ابتدي يحمر تطلعيه و تحضري نفسك للتغطيه

هاتبداي تغطيه بالصوص الابيض و تعملي خطوط بصوص التوفي و مكن اضافه صوص شوكولانه برضه

*"ملحوظه: ممكن تحطي الصوص علي السينابون الي هاتقدميه للاكل بس و لما تيجي تقدمي تبقي تحطي الصوص او تحطي مرة واحده زي ما عملت

لما تيجي تقدميه تاني يوم سخنيه فالمايكروويف ٢٠ ثانية