فراخ فرن مدخنه ( بطعم وريحه الشواء ) بطريقة جديدة رائعة

فراخ فرن مدخنه ( بطعم وريحه الشواء ) 

المكونات 

=-=-=-=

عدد 3 طماطم

معلقه صلصه طماطم معلبه

2 بصله

1 فلفل اخضر

نص قرن فلفل حامي

3 حبات بطاطس ( لو عايزه اكتر براحتك ) مقطعه شرائح

4 فصوص ثوم

سمنه

زيت

ملح وفلفل وورق لوره مطحون وروزماري وزعتر وحبهان مطحون ونص معلقه صغيره سكر وكسبره ناشفه

فحم

الطريقه 

=-=-=-=

حتسلقي الفراخ الاول وتحطي معاها جزرايه وبصلايه وحبهان

 ولوره وملح وفلفل اسمر وبعدين ...

حتجيبي 2 من الطماطم بتاعتك تضربيها في الكبه لوحدها من

 غير اي سائل وتحطيها في طبق وتحطي عليها الصلصه

وتفرمي فصين ثوم ناعم جدا جدا وتفرمي الفلفل الحامي برده

ناعم جدا

( متستعجليش افرميه حلو بس مش في الكبه ) وتحطيهم علي

 الخليط وبعدين تحطي السكر وبقيت التوابل بتاعك كلها والزيت

 وتقلبي حلو قوي ووتدخليها التلاجه

وبعدين تحضري مياه بتغلي تحطيلها مكعب مرق وزعتر وورق

 لوره وملح وتحطي فيها البطاطس بتاعتك تغلي مع المياه لمده

5 دقايق بالظبط مش اكتر وتصفيها

وبعدين تقطعي الفلفل شرائح صغيره والطمطايه الباقيه والبصله

 الباقيه وتحطيهم كلهم مع بعض وتحطيلهم معلقه من الخليط

 بتاع الصلصه اللي عملناها

وبعدين تحطي الفراخ بتاعتك فوقيها وتدهنيها بالخليط بتاعنا

 طبقه رقيقه ورفيعه جداااااا متكتريش وبعدين تولعي الشوايه

 بتاعه الفرن وتحطي الفراخ وتبقي بعيده عن نار الشوايه

 عشان تاخد راحتها وتعمل لون كويس

وبعد ما تعمل اللون اللي انتي عايزاه بس حاولي تخليه زي

 الصوره كده دا احسن لون للشواء واكتر مرحله بيبقي فيها

الطعم رهييييب ... وبعدين تجيبي ورقه فويل وتطبقيها وتعمليها

 طبق صغنن وتجيبي قطعه فحم وتحطيها علي النار لغايه ما

 تولع كلها وتحمر وتحطي طبق الفويل في نص صينيه الفراخ

 وتحطي فيه الفحم وتبقي محضره غطاء يبقي محكم جدا علي

 الصينيه ولو مفيش حضري ورقه فويل برده وبعدين تروحي

 حاطه معلقه سمنه او زبده علي الفحم وتروحي مغطيه الصينيه

 كويس بحيث انها متطلعش ولا سرسوب دخان من اللي حيطلع

 وتسيبيها لمده ربع ساعه كده وبعدين تكشفيها وبالهنا والشفا

 وحتبقي الفراخ والخضار بتاعك بريحه الشواء وتحفه

الطريقه دي بقي حتبقي اجمل فراخ كلتيها في حياتك بتتبيله

 جديده جدا وسهله جدا جدا

 اجمل من المشويه والبانيه واي نوع تاني

جربوها

تحيااتي

نور